पश्चिम बंगालच्या विधानसभा निवडणुकीनंतरही राज्यात हिंसाचार थांबण्याचे नाव घेत नाहीये. शनिवारीच पश्चिम बंगालच्या माजी मुख्यमंत्री ममता बॅनर्जी यांचे पुतणे तथा तृणमूल काँग्रेसचे राष्ट्रीय सरचिटणीस खासदार अभिषेक बॅनर्जी यांच्यावर अंडी, टमाटे फेकून हल्ला केल्याची घटना घडली होती. याच हल्ल्यासंदर्भात निवेदन देण्यासाठी आणि अटक केलेल्या टीमसी नेत्यांना आणि कार्यकर्त्यांना सोडण्याची मागणी करण्यासाठी खासदार कल्याण बॅनर्जी हे चंडीताला पोलीस ठाण्यात गेले असता या ठिकाणी तृणमूल आणि भाजप कार्यकर्त्यांमध्ये जोरदार राडा सुरू झाला. याच दरम्यान कल्याण बॅनर्जी यांच्यावर कोणीतरी चेंडू आणि दगडासारख्या वस्तूने हल्ला केला, ज्यामुळे त्यांच्या डोक्याला दुखापत झाली असा आरोप त्यांनी केला असून पश्चिम बंगालमध्ये राजकीय वातावरण चांगलेच तापले आहे.