Thane Viral Video News : ठाणे रेल्वे स्थानक परिसरात मोबाईल रिचार्जसाठी गेलेल्या किरण जाधव या मराठी तरुणाला दुकानदारांनी जबर मारहाण केल्याची धक्कादायक घटना घडली आहे. मिळालेल्या माहितीनुसार, किरण जाधव याने रिचार्जसंदर्भात दुकानदाराशी वाद घातला, जो नंतर हाणामारीत बदलला. दुकानदारांनी किरणला बेदम मारहाण केल्याने तो गंभीर जखमी झाला. या प्रकरणाची माहिती मिळताच नौपाडा पोलिसांनी तातडीने घटनास्थळी धाव घेतली आणि दोन दुकानदारांना ताब्यात घेतले. पोलिसांनी किरणच्या तक्रारीवरून गुन्हा दाखल करून तपास सुरू केला आहे. ठाणे रेल्वे स्थानक परिसरात अशा घटनांमुळे नागरिकांमध्ये भीतीचे वातावरण आहे. पोलिसांनी या प्रकरणात कठोर कारवाई करण्याचे आश्वासन दिले आहे, तर स्थानक परिसरातील सुरक्षाव्यवस्थेवर प्रश्नचिन्ह उपस्थित झाले आहे.