CJI Bhushan Gavai Latest News : ऑपरेशन यशस्वी झालं, पण रुग्णाचा मृत्यू असं विधान सुप्रीम कोर्टाने आमदारांच्या अपात्रतेवर आदेश देताना केले आहे. तेलंगणातील दहा आमदारांच्या अपात्रतेच्या प्रकरणाची सुनावणी कोर्टात पार पडली. १० आमदारांच्या अपात्रतेबाबत विधानसभा अध्यक्षांनी केलेल्या विलंबावरून कोर्टाने नाराजी व्यक्त केली. हा निर्णय पुढील ३ महिन्यांच्या आत घेण्याचे आदेशही कोर्टाकडून देण्यात आले आहे. सुप्रीम कोर्टाने हायकोर्टाचा स्थगितीचा आदेशही यावेळी रद्द केला.

तेलंगाणामधील हायकोर्टाने विधानसभा अध्यक्षांना चार आठवड्यांत अपात्रतेबाबत सुनावणी घेण्याचे वेळापत्रक निश्चित करण्याचे आदेश दिले होते. त्याविरोधात बीआरएसकडून सुप्रीम कोर्टात धाव घेण्यात आली होती. काँग्रेसची सत्ता आल्यानंतर तेलंगणाच्या बीआरएसमधील १० आमदारांनी काँग्रेसमध्ये प्रवेश केला. बीआरएसने त्या आमदारांच्या विरोधात कारवाई करण्यासाठी विधानसभा अध्यक्षांना पत्र पाठवत अपात्र करण्याची मागणी केली. मात्र, अध्यक्षांनी त्यावर निर्णय घेतला नाही. हायकोर्टातही दाद मिळाली नाही, त्यामुळे हे प्रकरण सुप्रीम कोर्टात पोहचले. गुरूवारी सरन्यायाधीश भूषण गवई आणि न्यायाधीश ए. जी मसीह यांच्या खंडपीठासमोर सुनावणी झाली.