अमरावती जिल्ह्याला वादळी वारा आणि अवकाळी पावसाने पुन्हा झोडपले आहे. वरूड, मोर्शी, अंजनगाव सुर्जी आणि धारणी तालुक्यांसह मेळघाट परिसरात चक्रीवादळाने हाहाकार माजवला. यामुळे कांदा, केळी, संत्रा आणि इतर पिकांचे मोठ्या प्रमाणात नुकसान झाले. विशेषतः अंजनगाव सुर्जीतील निमखेड बाजार, चिंचोना, डोंगरावर परिसरात केळी उत्पादक शेतकऱ्यांचे लाखोंचे नुकसान झाले. चिंचोना येथे वीज पडून दोन बैलांचा मृत्यू झाला.

मेळघाटात चक्रीवादळामुळे अनेक आदिवासींच्या घरांची छप्परे उडाली, तर विद्युत खांब आणि झाडे कोसळली. जिल्हा परिषद शाळांचेही छप्पर उडाल्याने शैक्षणिक अडचणी निर्माण झाल्या आहेत. अनेक आदिवासी बेघर झाले असून, शेती आणि पायाभूत सुविधांचे नुकसान झाल्याने प्रशासनासमोर पुनर्वसनाचा प्रश्न उभा आहे. हवामान खात्याने पावसाचा इशारा दिला असून, नागरिकांना सतर्क राहण्याचे आवाहन केले आहे.