संघर्ष गांगुर्डे, मयूर राणे | साम टीव्ही प्रतिनिधी

कल्याणनजीक वंदे भारत एक्स्प्रेसवर एका तरुणानं दगडफेक केल्याचा प्रकार घडला आहे. ही वंदे भारत एक्स्प्रेस मुंबईहून शिर्डीकडे जात होती. आज, शुक्रवारी सकाळी ही घटना घडली. रेल्वे पोलिसांनी दगडफेक करून वंदे भारत एक्स्प्रेसचे नुकसान करणाऱ्या हुल्लडबाज तरुणाला अटक केली आहे.

मुंबईहून आज सकाळच्या सुमारास शिर्डीकडे जाणाऱ्या वंदे भारत एक्स्प्रेसवर कल्याणच्या पत्री पुलाजवळ एका तरुणाने दगडफेक केली. यात एक्स्प्रेसच्या किमान दोन डब्यांच्या खिडक्यांच्या काचा फुटल्या आहेत. वंदे भारत एक्स्प्रेससह इतर एक्स्प्रेस गाड्या आणि एसी लोकलवरही त्याने दगडफेक केल्याची माहिती इतर प्रवाशांनी दिली. या प्रकरणी रेल्वे पोलिसांनी सनी कांबळे या तरुणाला अटक केली आहे. हुल्लडबाजी करण्यासाठी आरोपी तरुणाने हे कृत्य केल्याची प्राथमिक माहिती समोर आली आहे.