काँग्रेस पक्षाच्या अध्यक्षा सोनिया गांधी यांना पोटदुखीचा त्रास जाणवल्यामुळे त्यांना रविवारी दिल्लीतील सिर गंगा राम रुग्णालयात दाखल करण्यात आले आहे. रुग्णालयाने दिलेल्या अधिकृत माहितीनुसार, सध्या त्या गॅस्ट्रोएन्टेरोलॉजी विभागाच्या देखरेखीखाली उपचार घेत आहेत आणि त्यांची प्रकृती स्थिर असून, त्यांना निरीक्षणाखाली ठेवण्यात आले आहे. ही माहिती ANI वृत्तसंस्थेने दिली आहे. काही दिवसापूर्वीच सोनिया गांधी यांना शिमला येथील इंदिरा गांधी वैद्यकीय महाविद्यालया अस्वस्थ वाटल्याने तात्काळ रुग्णालयात नेण्यात आले होते. त्यावेळी त्यांचा एमआरआय स्कॅन करण्यात आला होता.

IGMC येथील डॉक्टरांनी त्यांच्या प्रकृतीबाबत माहिती देताना सांगितले होते की, सोनिया गांधी यांचा रक्तदाब थोडा वाढलेला होता, मात्र त्यांची तब्येत सामान्य असून घाबरण्याचं कारण नाही.

हिमाचल प्रदेशचे मुख्यमंत्री सुखविंदर सिंह सुक्खू यांचे मीडिया सल्लागार नरेश चौहान यांनी सांगितले की, सोनिया गांधी यांना काही किरकोळ त्रास जाणवत असल्यामुळेच त्यांना नियमित तपासणीसाठी रुग्णालयात दाखल करण्यात आले होते.

सोनिया गांधी यांच्या तब्येतीची माहिती मिळताच मुख्यमंत्री सुक्खूंनी उना दौरा रद्द करून तात्काळ शिमला येथे रवाना झाल्याचे काँग्रेसच्या एका वरिष्ठ नेत्याने सांगितले.