सोलापूर शहरात रात्रभर कोसळलेल्या मुसळधार पावसामुळे जनजीवन विस्कळीत झाले आहे. मित्रनगर परिसरासह सखल भागात मोठ्या प्रमाणावर पाणी शिरले असून नागरिकांचे संसारोपयोगी साहित्य भिजून नुकसान झाले आहे.महिलांच्या डोळ्यात अश्रू अनावर झाले. अनेक कुटुंबांना रात्रभर उघड्यावर काढावी लागली. महिलांना व मुलांना विशेषतः मोठ्या अडचणींचा सामना करावा लागत आहे.

जुना विडी घरकुल परिसर, अक्कलकोट रोड परिसरातील पंजावणी मार्केट तसेच होटगी रोड तलावाजवळील घरे पाण्याखाली गेली आहेत. अचानक आलेल्या पुरसदृश परिस्थितीमुळे रस्ते व वाहतूक व्यवस्था पूर्णपणे ठप्प झाली आहे. हवामान खात्याने यापूर्वीच मुसळधार पावसाचा इशारा दिला होता. प्रशासनाने मदतकार्य सुरू केले असून नागरिकांना सुरक्षित स्थळी हलवण्याचे आवाहन करण्यात येत आहे.