सिंधुदुर्ग जिल्ह्याचे पालकमंत्री नितेश राणे यांनी गुरुवारी कणकवली शहरातील बाजारपेठेतील मटका अड्ड्यावर अचानक धाड टाकत मोठी कारवाई केली. घेवारी नावाच्या व्यक्तीच्या अड्ड्यावर सुरू असलेल्या मटक्याच्या धंद्यावर त्यांनी अचानक पोहोचत सगळ्यांना धक्का दिला. या धाडीत नऊ ते दहा जण मटका खेळताना आढळले असून त्यांच्यासह मुख्य आरोपी घेवारीलाही ताब्यात घेण्यात आले आहे. विशेष म्हणजे, या कारवाईबाबत पोलिसांना पूर्वकल्पना देण्यात आली नव्हती. नितेश राणेंच्या धाडीनंतर मात्र कणकवली पोलीस तातडीने घटनास्थळी दाखल झाले व पुढील कारवाई सुरू केली. पालकमंत्री पदाची सूत्रे स्वीकारल्यानंतर नितेश राणे यांनी केलेली ही पहिलीच धडक कारवाई मानली जात आहे.