माजी गृहराज्यमंत्री सिद्धराम म्हेत्रे यांनी अक्कलकोट पंचायत समितीच्या बिडिओला अर्वाच्य भाषेत दमदाटी केल्याची घटना घडली आहे. यावेली पंचायत समिती ऑफिस जाळून टाकण्याची धमकी देखील त्यांनी दिली आहे. महाविकास आघाडीकडून निकृष्ट दर्जाच्या रस्त्यांच्या मुद्द्यावर हलगीनाद आंदोलन करण्यात आलं होतं. यावेली निवेदन स्वीकारताना झालेल्या वादात हा प्रकार घडला. शंकर कविटके असं या बिडिओच नाव आहे.

'ही पंचायत समिती मीच बांधली आहे. तिला जाळायला मला किती वेळ लागेल. माझं कोणीच काही वाकडं करू शकत नाही.' अशा शब्दांत माजी गृहराज्यमंत्री सिद्धराम म्हेत्रे यांनी अक्कलकोट पंचायत समितीचे बिडिओ शंकर कविटके यांना दमदाटी केली आहे. परिसरातील निकृष्ट दर्जाच्या रस्त्यांच्या कामाबद्दल महाविकास आघाडीने आक्रमक पवित्र घेत हलगी नाद आंदोलन बुधवारी केलं. यावेळी निवेदन स्वीकारायला आलेल्या अक्कलकोट पंचायत समितीच्या बिडिओ शंकर कविटके यांना अर्वाच्य भाषेत दमदाटी केली आहे.