विरार लोकलमध्ये तिकीट तपासणीवरून प्रवासी आणि टीसीमध्ये वाद झाला. तिकीट विचारल्यामुळे संतप्त झालेल्या प्रवाशाने टीसाला मारहाण केली. त्यानंतर या प्रवाशाला टीसी ऑफिसमध्ये आणण्यात आले. याठिकाणी देखील प्रवाशाने तुफान राडा केला. त्याने टीसी ऑफिसमधील साहित्याची तोडफोड केली. टीसी ऑफिसमधील कम्प्युटर, तसंच इतर महत्वाच्या वस्तूंची त्याने तोडफोड केली.

दादर ते बोरीवली लोकलमध्ये फस्ट क्लासच्या डब्यात हा प्रवासी बसला होता. मात्र त्याच्याकडे सेकंड क्लासचे तिकीट होते. त्यामुळे टीसीने त्याच्याकडे विचारणा केली असता दोघांमध्ये वाद झाला. यानंतर झालेल्या हाणामारीत दोघेही जखमी झाले आहेत. या प्रवाशाचा टीसी ऑफिसमध्ये तोफडोड करतानाचा व्हिडीओ समोर आला असून तो तुफान व्हायरल होत आहे. या घटनेमुळे रेल्वे कर्मचाऱ्यांच्या सुरक्षेचा प्रश्न ऐरणीवर आला आहे. याआधी देखील मुंबई लोकलमध्ये टीसीला प्रवाशांनी मारहाण केल्याच्या अनेक घटना समोर आल्या आहेत.