Rs 1 lakh bounty to Who slapped Gunaratna sadavarte : महाराष्ट्रातील पहिली ते चौथीपर्यंतच्या शाळेत हिंदी भाषा तिसरी भाषा म्हणून शिकवण्याचा शासन निर्णय सरकारनं काढला होता. त्याला मनसे प्रमुख राज ठाकरे आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरेंसह विविध राजकीय पक्ष आणि संघटनांनी विरोध केला होता. या विरोधामुळं सरकारनं माघार घेत त्रिभाषा सूत्रासंदर्भात काढलेले दोन्ही जीआर रद्द केले होते. हा मराठी माणसाचा विजय आहे, असं राज आणि उद्धव ठाकरेंनी म्हटलं होतं. तसंच मनसे आणि शिवसेनेकडून विजयी मेळावा आयोजित करण्यात येणार आहे. त्यावर गुणरत्न सदावर्ते यांनी टीका केली होती.

राज ठाकरे किंवा उद्धव ठाकरे असो, कुणाच्या बापाच्या घरचं शिक्षण नाही. स्वतःची लेकरं किती भाषा शिकले, कोणत्या शाळेत शिकले ते जाहीर करावे. दुसऱ्यांच्या लेकरांच्या शैक्षणिक नुकसानासाठी कुऱ्हाड घेऊन निघालात. कोणताही महाराष्ट्रातील सामान्य माणूस सहन करणार नाही, अशी टीका सदावर्तेंनी केली होती. त्यावर ठाकरे गटाकडून संताप व्यक्त करण्यात येत आहे. गुणरत्न सदावर्ते यांना कानाखाली मारणाऱ्याला शिवसेना ठाकरे पक्षाच्या पदाधिकाऱ्याकडून एक लाखाचे बक्षीस जाहीर करण्यात आले आहे. हिंदी सक्तीविरोधात मराठी माणसाचा विजय झाला आहे. गुणरत्न सदावर्ते हे नेहमी मराठी माणसाच्या विरोधात बोलत आहेत. या माणसाला जो कानाखाली वाजवेल त्याला एक लाखाचे बक्षीस देण्यात येईल, असं सायन-कोळीवाडामधील शिवसेना ठाकरे पक्षाचे विधानसभा संघटक प्रशांत भिसे यांनी जाहीर केलं.