मुंबईच्या जोगेश्वरी परिसरात रविवारी ठाकरेसेना आणि शिंदेसेनेच्या कार्यकर्त्यांमध्ये जोरदार राडा झाला. छत्री वाटपाच्या कार्यक्रमावरून सुरू झालेला वाद बाचाबाचीतून थेट हाणामारीपर्यंत गेला. या प्रकारामुळे परिसरात काही वेळ तणावाचे वातावरण निर्माण झाले होते.

ठाकरेसेनेतर्फे आयोजित करण्यात आलेल्या मोफत छत्री वाटपाच्या कार्यक्रमावर शिंदेसेनेच्या शाखाप्रमुखांनी टीका केली होती. या टीकेनंतर दोन्ही गट आमनेसामने आले आणि एकमेकांवर आरोप-प्रत्यारोप सुरू झाले. वाद इतका वाढला की कार्यकर्त्यांमध्ये धक्काबुक्की आणि हाणामारी सुरू झाली.

घटनेची माहिती मिळताच पोलिसांनी तत्काळ घटनास्थळी धाव घेत हस्तक्षेप केला आणि परिस्थिती नियंत्रणात आणली. दोन्ही गटांचे काही कार्यकर्ते किरकोळ जखमी झाल्याची माहिती मिळत आहे. या प्रकरणी पोलिसांकडून अधिक तपास सुरू आहे.

जोगेश्वरीतील या घटनेमुळे स्थानिक राजकारण पुन्हा एकदा पेटले असून, ठाकरेसेना आणि शिंदेसेना यांच्यातील संघर्ष अधिक तीव्र होण्याची शक्यता व्यक्त केली जात आहे.