साईबाबा व साईसंस्थानविरोधात खोटी माहिती पसरवणाऱ्यांना आता कारवाई होणार आहे. अशा प्रकारांची गांभीर्याने दखल घेत साईसंस्थानचे मुख्य कार्यकारी अधिकारी गोरक्षनाथ गाडीलकर यांनी स्पष्ट इशारा दिलाय की, संस्थानविषयी बदनामीकारक पोस्ट किंवा खोट्या अफवा पसरवल्यास थेट फौजदारी गुन्हा दाखल करण्यात येणार आहे.

अलीकडेच सोशल मीडियावर “साई संस्थानने हज यात्रेसाठी ३५ कोटींची देणगी दिली” अशी खोटी आणि भ्रामक माहिती व्हायरल झाली होती. यावर प्रतिक्रिया देताना गाडीलकर यांनी स्पष्ट केलं की, संस्थानने अशा कोणत्याही प्रकारचा निधी दिलेला नाही.

साईसंस्थानच्या नावाने अफवा पसरवणं, धार्मिक भावना दुखावणं आणि समाजात गैरसमज निर्माण करणं हे गुन्ह्याचं कारण ठरणार आहे. त्यामुळे नागरिकांनी अशा कोणत्याही अफवांवर विश्वास न ठेवता अधिकृत माहितीचीच खात्री करावी, असं आवाहनही गाडीलकर यांनी केलं आहे.