बारामती: राष्ट्रवादी कॉँग्रेसचे सर्वेसर्वा आणि देशाचे ज्येष्ठ नेते शरद पवार यांनी बारामतीच्या सुपा येथील विद्या प्रतिष्ठान शाळेला दिलेल्या भेटीत विद्यार्थ्यांसोबत बुद्धिबळाचा रंगलेला सामना सध्या चर्चेचा विषय ठरत आहे. विद्यार्थ्यांनी स्वतः तयार केलेले बुद्धिबळ पवारांना दाखवले असता त्यांनी ते आवर्जून पाहिले आणि खेळण्याचा मोह आवरला नाही.

यावेळी पवार यांनी विद्यार्थ्यांसोबत बसून काही वेळ बुद्धिबळ खेळला. या अनपेक्षित क्षणामुळे विद्यार्थ्यांमध्ये उत्साहाचे वातावरण निर्माण झाले होते. पवार यांच्या साधेपणाचा आणि विद्यार्थ्यांशी असलेल्या संवादाचा अनुभव उपस्थितांना खास वाटला.

या भेटीदरम्यान त्यांच्या पत्नी प्रतिभा पवार याही उपस्थित होत्या. त्यांनीही विद्यार्थ्यांशी संवाद साधत त्यांच्या उपक्रमांचे कौतुक केले. विद्या प्रतिष्ठानमधील हा खास क्षण सोशल मीडियावरही चर्चेत आला असून, विद्यार्थ्यांसोबतचा पवारांचा हा मैत्रीपूर्ण अंदाज अनेकांच्या पसंतीस उतरला आहे. तसेच बुद्धिबळ खेळत असताना शरद पवारांची पुढची चाल काय? हा प्रश्न उपस्थित होत आहे.