राष्ट्रवादी काँग्रेसमध्ये फूट पडली आणि महाराष्ट्रातील राजकारणात भूकंप झाला. या भूकंपानंतर राष्ट्रवादी काँग्रेसमधील अजित पवार आणि शरद पवार असे दोन गट दोन निवडणुकांमध्ये आमनेसामने आले. मागील काही दिवसांत विविध कार्यक्रमांच्या निमित्तानं शरद पवार आणि अजित पवार हे दोन्ही दिग्गज नेते व्यासपीठावर एकत्र आले होते. त्यामुळे हे दोन्ही नेते पुन्हा एकत्र येतील अशा चर्चा सुरू झाल्या. आता पुन्हा राजकीय नेत्यांच्या आणि विश्लेषकांच्या भुवया उंचावणारी राजकीय घटना घडली आहे.

राष्ट्रवादी काँग्रेसचे नेते अजित पवार आणि राष्ट्रवादी काँग्रेस शरदचंद्र पवार पक्षाचे सर्वेसर्वा शरद पवार या दोन नेत्यांची भेट झाली आहे. अजित पवार यांनी शरद पवार यांची भेट घेतल्याचे सांगण्यात येत आहे. वायबी सेंटरमध्ये हे दोन्ही नेते भेटले. त्यांच्यात जवळपास तासभर चर्चा झाल्याचे समजते. प्राथमिक वृत्तानुसार, माळेगाव साखर कारखान्यासंदर्भात त्यांच्यात चर्चा झाल्याचे बोलले जात आहे. मात्र, आगामी महापालिका आणि स्थानिक स्वराज्य संस्थांच्या निवडणुकांच्या आधी ही भेट झाल्याने महत्व प्राप्त झाले आहे.