सातारा जिल्ह्यातील खटाव तालुक्यात जोरदार पाऊस झाल्याने अनेक भागांमध्ये पाणी साचण्याची स्थिती निर्माण झाली आहे. पुसेगाव-फलटण मार्गावर मोठ्या प्रमाणात पाणी साचले असून, त्यामुळे काटेवाडी शिवारातील शेतकऱ्यांना आर्थिक नुकसानाला सामोरं जावं लागलं आहे. या भागातील ओढ्यांमध्ये पावसामुळे मोठ्या प्रमाणात पाणी साचले असून, शेतकऱ्यांनी साठवून ठेवलेला कांदा विक्रीसाठी बाहेर काढणं कठीण झालं आहे. काही शेतकऱ्यांनी पाण्यात उतरून कांद्याचे पोती वाहून नेण्याचा प्रयत्न केला.

पावसामुळे वाहतुकीवरही परिणाम झाला असून, शेतीमाल बाहेर नेणे आणि बाजारात विक्री करणे आव्हानात्मक बनलं आहे. या परिस्थितीमुळे शेतकऱ्यांचे मोठे नुकसान झाले असून, प्रशासनाने तत्काळ पंचनामे करून मदत द्यावी, अशी मागणी शेतकरी वर्गातून होत आहे. सातत्याने होणाऱ्या पावसामुळे शेतकऱ्यांमध्ये चिंतेचं वातावरण आहे.