संत एकनाथ महाराज पालखी सोहळ्याला आजपासून सुरुवात होणार असून, सायंकाळी पैठणहून पालखी पंढरपूरकडे प्रस्थान करणार आहे. यावर्षी प्रथमच संत एकनाथ महाराजांच्या चांदीच्या पादुका 120 किलो चांदीच्या रथात ठेवण्यात येणार आहेत. दुपारी 12 वाजता जुन्या नाथ मंदिरातून चांदीच्या रथात पादुका ठेवून पालखी मिरवणुकीला सुरुवात होणार आहे. सूर्यास्ताच्या वेळी पालखी पंढरपूरकडे प्रस्थान करणार आहे.

या रथ निर्मितीसाठी नाथ वंशज रघुनाथ महाराज गोसावी यांच्या संकल्पनेतून भाविकांनी लोकवर्गणी जमा केली आहे. तब्बल 1 कोटी 20 लाख रुपये खर्चून हा रथ तयार करण्यात आला आहे. एकूण 18 दिवसांचा पालखी प्रवास असून विविध ठिकाणी नित्यधार्मिक कार्यक्रम, हरिपाठ व भजन आयोजित करण्यात आले आहेत. भक्तांच्या उत्साहामुळे यंदाची वारी अधिक भाविकवर्धक ठरणार आहे.