खासदार संजय राऊत यांनी शिंदे गटाचे नेते व मंत्री दादा भुसे यांच्यावर थेट हल्लाबोल केला आहे. ईडीच्या धाडीचे धागेदोरे थेट दादा भुसेंपर्यंत जाऊ शकतात, असा गौप्यस्फोट करत राऊतांनी सत्ताधाऱ्यांवर निशाणा साधला आहे.याचसोबत त्यांनी मुख्यमंत्री देवेंद्र फडणवीसांवर टीका करत म्हटलं, समज द्या अन् सोडून द्या हा नवा ‘फडणवीस अॅक्ट’ सुरु आहे. सत्ताधाऱ्यांकडून केवळ निवडक लोकांवर कारवाई केली जात असल्याचा आरोप करत राऊतांनी राजकीय भेदभावावर प्रश्नचिन्ह उपस्थित केलं. तसेच, अनिलकुमारांना मिळालेली प्रशासकीय बढती ही दादा भुसेंच्या विशेष आग्रहामुळे मिळाली, असा आरोपही राऊतांनी केला.

सटाणा शहरासह बागलाण तालुक्यात आयुक्त अनिलकुमार पवार यांच्या नातेवाईकांच्या नावे असलेल्या मालमत्तेवर ईडीची चौकशी सुरु आहे. वसई विरार महापालिकेचे आयुक्त अनिलकुमार पवार यांच्या मालमत्तेवर राज्यभर ईडी कारवाई सुरू असून, त्यांच्या नाशिकसह सटाणा येथील मालमत्तेवर ईडीच्या एका पथकाने सकाळ पासून कारवाई सुरू केले असून त्यांच्या भावाच्या नावावर येथील मालमत्ता आहे. सटाणा तालुक्यात विविध ठिकाणी तसेच नाशिकमध्ये अनिलकुमार पवार व त्यांच्या कुटुंबियांच्या नावे शेत जमीन, फॉर्म हाऊस तसेच प्लॉट असल्याचे समजते. सकाळच्या सुमारास सटाणा शहरात इनोव्हा गाड्या व त्यात पोलीस असल्याने शहरात चर्चेचा विषय बनला होता.