संगमनेर शहरालगतच्या घुलेवाडी परिसरातील पांढरीचा मळा येथे पती पत्नीवर बिबट्याने हल्ला केल्याची घटना घडली आहे. या हल्ल्यात ठकुबाई भाऊसाहेब पानसरे या गंभीर जखमी झाल्या असून त्यांच्यावर संगमनेर शहरातील खाजगी रुग्णालयात उपचार सुरू आहेत.

संगमनेर तालुक्यात गेल्या काही दिवसांपासून बिबट्यांच्या हालचालींमध्ये मोठी वाढ झाली आहे. ग्रामीण भागात तसेच शहरालगतच्या परिसरातही बिबटे दिसण्याच्या घटना वाढत असल्याने नागरिकांमध्ये भीतीचे वातावरण पसरले आहे. विशेषत: ऊसतोडीचा हंगाम सुरू असल्याने बिबटे बाहेर पडत असल्याची स्थानिकांची माहिती आहे. परिसरात वनविभागाने गस्त वाढवावी तसेच अत्यावश्यक ठिकाणी पिंजरे लावून बिबट्यांना पकडण्याची मागणी नागरिक करत आहेत.