भाजप सरकारने जलपूजन केलेल्या अरबी समुद्रातील शिवाजी महाराजांच्या पुतळ्याची पाहणी करण्यावर संभाजीराजे छत्रपती ठाम असून आपल्या काही कार्यकर्त्यांसह आता ते गेट वे ऑफ इंडिया येथून बोटीने स्मारकाच्या ठिकाणी निघाले आहेत. यावेळी त्यांनी ''मी फक्त मुंबईतील अरबी समुद्रात जाऊन शिवस्मारक शोधणार आहे. मी पाच वर्ष खासदार असताना यासाठी पाठपुरावा केला होता. ही माझी राजकीय भूमिका नाही. गडकोट किल्ल्यांची अवस्था वाईट आहे. माझा कुणालाही कोंडीत पकडण्यावा प्रयत्न नाही, अशी आपली भूमिका स्पष्ट केली आहे.

अरबी समुद्रात आठ वर्षांपूर्वी डिसेंबर 2016 मध्ये भाजप आणि शिवसेना सरकारने भव्य कार्यक्रम आयोजित करुन अरबी समुद्रात पंतप्रधान नरेंद्र मोदी यांच्या हस्ते शिवस्मारकाचं जलपूजन केलं होतं. शिवस्मारकाच्या जलपूजनाला काही दिवसांत आठ वर्षे पूर्ण होतील, पण महाराजांच्या स्मारकाचे काम काही सुरू झालं नाही. त्यामुळे स्वराज्य पक्षाचे नेते संभाजीराजे यांनी चला, शिवस्मारक शोधूया असं म्हणत सरकारविरोधात पहिली मोहीम काढली आहे. यासाठी राज्यभरातून कार्यकर्ते मुंबईत दाखल होत आहेत.