ईव्हीएम हॅक करता येतं. मी स्वत: इंजिनियर आहे. त्यामुळे मला सगळं माहिती आहे, असा दावा रासपचे अध्यक्ष महादेव जानकर यांनी केला आहे. अनेक ठिकाणी ईव्हीएममध्ये घोटाळा झाला, म्हणून महायुतीच्या जागा निवडून आल्या, असा खळबळजनक आरोपसुद्धा जानकर यांनी केला आहे.

राज्यात विधानसभा निवडणुकीत ईव्हीएममध्ये घोटाळा केल्याचा आरोप विरोधकांकडून केला जात आहे. त्याविरोधात आंदोलन देखील सुरू करण्यात आलं आहे. अशातच आता रासपचे महादेव जानकर यांनी देखील याबाबत खळबळजनक दावा केला आहे. मी स्वत: इंजिनियर असल्याने ईव्हीएम हॅक करता येतं हे मला माहिती आहे, असं त्यांनी म्हंटलं आहे. तसंच मला महायुतीचा अनुभव खूप वाईट आला आहे. त्यामुळं मी त्यांच्यातून बाहेर आलो आहे. काँग्रेसला अजून चाखल नाही, त्यामुळं त्यांच्याकडे न जाता स्वतंत्र पुढे जायची आमची भूमिका आहे. त्यामुळं येत्या काळात आमची एकला चलोची भूमिका असेल अस म्हणत असतानाच माझ्या पक्षाचा राज्यात सध्या एकच आमदार आहे, कोणासोबत जायचं याचा अजून निर्णय झालेला नाही. पण जर त्या आमदाराने पक्षाला न विचारता काही निर्णय घेतला तर त्यावर नक्की आम्ही कारवाई करू असा इशारा रासापाचे राष्ट्रीय अध्यक्ष महादेव जानकर यांनी आपल्याच पक्षाचे आमदार रत्नाकर गुट्टे यांना दिलाय.

Edited By Rakhi Rajput