महाराष्ट्र राज्य विधिमंडळाच्या अर्थसंकल्पीय अधिवेशनाची सुरुवात आजपासून झाली. अधिवेशनाच्या पहिल्याच दिवशी अजित पवार यांच्या निधनाबद्दल दोन्ही सभागृहात शोकप्रस्ताव मांडण्यात आला. त्यावेळी रोहित पवारांनी त्यांच्या आठवणींना उजाळा दिला. यावेळी अजित पवारांच्या आठवणी सांगताना पुतणे आणि आमदार रोहित पवार भावूक झाले. बोलताना त्यांना हुंदका भरून आला, त्यांच्या डोळ्यात अश्रू आले. अजितदादा पवार नावाचा जादूगार सबंध महाराष्ट्राला हसवत हसवत गेला. दादांच्या जाण्याने राजकारणातील मिश्कीलपणा गेल्याचं रोहित पवार म्हणाले.

यावेळी अजितदादांची आठवण सांगताना रोहित पवार यांनी एक पण देखील घेतला. रोहित पवार यांच्या शर्टच्या वरचे बटण उघडे असायचे त्यावरून अजित पवार त्यांना बोलत असायचे. आता चाळीस-पन्नास वर्षानंतर कधी दादांची वरती कधी भेट झाल्यानंतर आपण त्यांच्यासमोर हे बटण लावू. तोपर्यंत शर्टचे बटण तसेच खुलं ठेवू, त्यामुळे दादांची रोज आठवण येईल असं रोहित पवार म्हणाले. अजितदादांच्या अपघाताला जो कुणी दोषी असेल त्याला तुरुंगात पाठवल्याशिवाय सोडणार नाही असंही ते म्हणाले.