पुण्यातील रेव्ह पार्टी प्रकरणी सध्या न्यायालयीन कोठडीत असलेला प्रांजल खेवलकरसह पत्नी रोहिणी खडसे देखील अडचणीत येण्याची शक्यता आहे. मोबाइलमधील पुराव्यांमध्ये छेडछाड केल्याचा पोलिसांना संशय असून, संशयाची सुई ही रोहिणी खडसेंच्या दिशेने असल्याचे सांगितले जात आहे. पुणे पोलिसांनी याबाबत कोर्टात नवी माहिती दिली आहे.

प्रांजल खेवलकरकडून पुणे पोलिसांनी दोन मोबाइल जप्त केले होते. त्यातील एक नंबर हा सोनार नावाच्या व्यक्तीच्या नावाने घेण्यात आला होता. त्या व्यक्तीने काही दिवसांपूर्वी सीम हरवले असल्याचे सांगून पुन्हा तोच क्रमांक मिळवला. त्या क्रमांकावर व्हॉट्सअॅप डाउनलोड करून सर्व डेटा डिलिट केला. त्यामुळे पोलिसांकडे असलेल्या खेवलकरच्या मोबाइलमधील व्हॉट्सअॅप डेटा डिलिट झाला. हे सर्व रोहिणी खडसेंनी घडवून आणल्याचा संशय पोलिसांना आहे. त्यामुळे सोनार नावाच्या व्यक्तीसह रोहिणी खडसेंना देखील सहआरोपी करण्याच्या हालचाली सुरू आहेत, असे सांगितले जात आहे.

खेवलकरच्या जामीन अर्जावर ४ सप्टेंबरला सुनावणी

प्रांजल खेवलकरच्या जामीन अर्जावर ४ सप्टेंबरला सुनावणी होणार आहे. पुणे कोर्टात आज, सोमवारी सुनावणी झाली. खेवलकर सध्या न्यायालयीन कोठडीत असून, येरवडा कारागृहात आहेत.