राजकारणात कधीच कोण कायमचा मित्र नसतो आणि शत्रूही नसतो. याची पुन्हा एकदा प्रचिती आली आहे. अलीकडच्या काळात ठाकरे बंधू मुख्यमंत्री आणि भाजपवर जोरदार टीका करताना दिसत आहे. अशातच आज मनसे प्रमुख राज ठाकरे, शिवसेना(UBT) प्रमुख उद्धव ठाकरे आणि राज्याचे मुख्यमंत्री देवेंद्र फडणवीस हे एकाच व्यासपीठावर आले, निमित्त होते ते प्रशांत कुलकर्णी संपादित हास्यरेषा या मराठी व्यंगचित्रकारांच्या इतिहासावरील विशेष ग्रंथाचा प्रकाशन सोहळ्याचे. या कार्यक्रमात ठाकरे बंधूंनी फडणवीसांवर जोरदार टोलेबाजी केली. तर मुख्यमंत्र्यांनी देखील भाषण सुरू झाल्यावर यावर प्रतिक्रिया दिली. मुख्यमंत्री देवेंद्र फडणवीस यांनी भाषणाच्या सुरुवातीलाच तिन्ही नेते एकत्र येण्यावर भाष्य केले. ते म्हणाले, सगळे डावीकडे गेले म्हणून मी उजवीकडे आलो. त्यांच्या या व्यक्तव्याने सभागृहात एकच हशा पिकला.

पुढे बोलताना फडणवीस म्हणाले, आशीषजी म्हणाले की राज ठाकरे यांनी बोलावलं म्हणून मी आलो. पण मी तुम्हाला सांगतो, २०१९ पर्यंत उद्धवजी यांनी जेव्हा-जेव्हा बोलावलं, तेव्हा-तेव्हा मी गेलो. त्यानंतर त्यांनी बोलावलंच नाही. मी वाट बघत राहिलो. असे म्हणत फडणवीस यांनी उद्धव ठाकरे यांना चिमटा काढला.