रायगडमध्ये मासेमारी बंदीच्या आदेशाचे उल्लंघन केल्याप्रकरणी ३८ मच्छिमारांवर कारवाई करण्यात आली आहे. १ जून ते ३१ जुलै या कालावधीत खोल समुद्रातील मासेमारीवर बंदी असते. मात्र, ही बंदी झुगारून काही मच्छिमार मासेमारी करत असल्याची माहिती मिळाल्यानंतर मत्स्य व्यवसाय विभागाने ही कारवाई केली.

या कारवाईत ८ बोटी जप्त करण्यात आल्या असून संबंधित मच्छिमारांकडून एकूण २९ लाख रुपयांचा दंड वसूल करण्यात आला आहे. खोल समुद्रातील माशांच्या प्रजातींना पुनरुत्पादनासाठी वेळ मिळावा यासाठी ही मासेमारी बंदी अत्यंत महत्त्वाची मानली जाते. बंदी काळात मासेमारी करताना आढळून आल्यास आणखी कठोर कारवाई करण्याचा इशारा देखील प्रशासनाने दिला आहे.