सचिन बनसोडे, राहुरी | साम टीव्ही

अहमदनगर जिल्ह्यातील राहुरी विधानसभा पोटनिवडणुकीत चुरस निर्माण झाली आहे. ही निवडणूक बिनविरोध होणार नाही, हे स्पष्ट झालं आहे. ७ उमेदवार निवडणूक रिंगणात उतरले आहेत. भाजप आणि राष्ट्रवादी काँग्रेस (शरद पवार) यांच्यात मुख्य लढत होईल. या दोन पक्षांव्यतिरिक्त आणखी पाच उमेदवार ही निवडणूक लढत आहेत.

राहुरीची पोटनिवडणूक प्रतिष्ठेची झाली आहे. ही निवडणूक बिनविरोध होईल, अशी चर्चा होती. पण राजकीय घडामोडी घडल्या आणि ही निवडणूक चुरशीची होईल हे स्पष्ट झाले आहे. या पोटनिवडणुकीसाठी ३० जणांनी उमेदवारी अर्ज दाखल केले होते. अर्ज माघारीचा आजचा शेवटचा दिवस होता. २३ जणांनी माघार घेतली. तर प्रमुख पक्षांच्या दोन उमेदवारांसह एकूण सात उमेदवार रिंगणात आहेत. भाजपकडून अक्षय शिवाजी कर्डिले यांना उमेदवारी दिली आहे. तर शरद पवार यांच्या राष्ट्रवादी काँग्रेसने गोविंद मोकाटे यांना उमेदवारी दिली आहे. याशिवाय संतोष एकनाथ चोळके हे वंचित बहुजन आघाडीचे उमेदवारही रिंगणात आहेत. रावसाहेब सदाराम खेवरे, महेश केशव हापसे, सुरेश दत्तात्रय लांबे आणि अथर्व साहेबराव म्हसे हे इतर अपक्ष उमेदवारही निवडणुकीत नशीब आजमावत आहेत.