पुणे: पोलीस भरतीसाठी मैदानी सराव करणाऱ्या तरुण-तरुणींवर आज सकाळी गावगुंडांनी हल्ला केल्याची धक्कादायक घटना समोर आली आहे. पुण्यातील तळजाई टेकडीवर दररोज सकाळी सराव करणारी मुलं व मुली आज सकाळी नेहमीप्रमाणे रनिंग करत असताना १० ते १२ गावगुंडांनी अचानक तेथे जाऊन गोंधळ घालायला सुरुवात केली.

प्रत्यक्षदर्शींनुसार, या गुंडांनी आधी मुलींना उद्देशून अश्लील टिप्पणी केली, शिवीगाळ केली आणि नंतर काही मुलांना मारहाण करत "तुमची लायकी नाही पोलीस होण्याची" अशा अपमानास्पद शब्द बोलले.

तक्रारदार विद्यार्थ्यांनी सांगितलं की गेल्या काही दिवसांपासून ही टोळी सराव करणाऱ्या मुला-मुलींचा पाठलाग करत होती. अश्लील कमेंट, पाहून अश्लील चाळे, शिवीगाळ असे प्रकार सातत्याने घडत होते. मात्र आज त्यांनी थेट हात चालवत काही मुलांना मारहाण केली आणि परिसरात भीतीचं वातावरण निर्माण केलं. या प्रकारानंतर संबंधित प्रशिक्षणार्थी, त्यांचे मार्गदर्शक आणि शिक्षक सहकारनगर पोलीस ठाण्यात पोहचले असून अधिकृत तक्रार दाखल करण्यात आली आहे. पोलिसांनी घटनेची गंभीर दखल घेतली असून आरोपींविरोधात गुन्हा दाखल करण्याची प्रक्रिया सुरू आहे