पुण्यातील लोहगाव परिसरातून एक धक्कादायक घटना समोर आली आहे. प्रवेश परीक्षेत कमी गुण मिळाल्याने नैराश्यात गेलेल्या १८ वर्षीय विद्यार्थिनीने गळफास घेऊन आत्महत्या केल्याची घटना घडली आहे. दुर्वा दत्तात्रय खांदवे असे मृत विद्यार्थिनीचे नाव आहे. मिळालेल्या माहितीनुसार, दुर्वाने अलीकडेच एका खाजगी शिक्षण संस्थेच्या प्रवेश परीक्षेत (सीईटी) भाग घेतला होता. मात्र अपेक्षेपेक्षा कमी गुण मिळाल्यामुळे ती मानसिक तणावाखाली होती. या नैराश्यातूनच तिने शुक्रवारी सकाळी आपल्या राहत्या घरी गळफास घेत आत्महत्या केली.

घटनेची माहिती मिळताच परिसरात एकच खळबळ उडाली. या प्रकरणी लोहगाव पोलीस ठाण्यात आकस्मिक मृत्यूची नोंद करण्यात आली असून पुढील तपास सुरू आहे. दुर्वाचे वडील नोकरदार असून आई गृहिणी आहे. तिच्या अकाली निधनाने कुटुंबावर दु:खाचा डोंगर कोसळला असून परिसरात हळहळ व्यक्त केली जात आहे.