पुण्यातील डेक्कन जिमखाना मेट्रो स्थानकाला मध्यवर्ती पेठांशी जोडणाऱ्या पादचारी पुलाच्या कामासाठी आज मध्यरात्रीपासून ५ सप्टेंबरपर्यंत भिडे पूल वाहतुकीसाठी पूर्णपणे बंद ठेवण्यात येणार आहे. दरम्यान, नदीपात्रातील रस्ता मात्र वाहतुकीसाठी खुला राहणार आहे. डेक्कन जिमखाना स्थानकाला जोडणाऱ्या या पादचारी पुलाचे काम लवकरात लवकर पूर्ण करण्याचा महामेट्रोचा प्रयत्न आहे. तोपर्यंत नागरिकांनी वाहतुकीसाठी लकडी पूल (संभाजी पूल), बालगंधर्व पूल आणि झेड ब्रिज (Z-Bridge) या पर्यायी मार्गांचा वापर करावा, असे आवाहन महामेट्रोकडून करण्यात आले आहे.

का घेतला हा निर्णय?

डेक्कन जिमखाना मेट्रो स्थानकाला जोडणारा पादचारी पूल मुठा नदीवरील भिडे पुलाच्या वरच्या बाजूने बांधण्यात येत आहे. सध्या या पुलाचे काम अंतिम टप्प्यात असून, नागरिकांच्या सुरक्षेचा उपाय म्हणून भिडे पूल ३ महिने बंद ठेवण्याचा निर्णय घेण्यात आला आहे. हा पादचारी पूल पूर्ण झाल्यानंतर नारायण पेठ, शनिवार पेठ आणि लक्ष्मी रस्ता परिसरातील नागरिक तसेच विद्यार्थ्यांना मेट्रो स्टेशनवर ये-जा करणे अधिक सोपे होणार आहे.