मुंबईकरांसाठी महत्त्वाची बातमी आहे. प्रभादेवी परिसरातील पूल आज रात्रीपासून वाहतूकीसाठी बंद होणार आहे. वरळी, शिवडी एलिव्हेटेड रोड प्रकल्पांतर्गत मुंबई महानगर प्रदेश विकास प्राधिकरणाकडून (MMRDA) जुन्या पुलाचे पाडकाम करण्यात येणार आहे. त्याबदल्यास दोन मजली नवा पूल उभारला जाणार आहे. या कामासाठी पुलावरील वाहतूक आज रात्री ११.५९ पासून बंद करण्यात येणार असल्याची माहिती मुंबई वाहतूक पोलिसांनी दिली आहे. पुल बंद झाल्यामुळे या परिसरात मोठे वाहतूक बदल करण्यात आलेले आहेत. नागरिकांनी पर्यायी मार्गांचा वापर करावा, असे आवाहन पोलिसांकडून करण्यात आले आहे. या नव्या पुलामुळे भविष्यात वाहतूक कोंडी मोठ्या प्रमाणात कमी होईल असे दिसून येत आहे.