मुंबई येथील पवईमध्ये रोहित आर्य नावाच्या इसमाने काल 17 मुलांना ऑडिशनच्या नावाने बोलावून डांबून ठेवल्याची घटना घडली होती. परभणी, लातूर तसेच राज्यातील विविध भागातून शूटिंगच्या नावाखाली हे विद्यार्थी त्याने बोलावले होते. आपल्या कामाचे सरकारने पैसे थकवल्याचा आरोप त्याच्याकडून करण्यात आला होता. मात्र पोलिसांनी या ठिकाणी धाव घेत विद्यार्थ्यांची सुटका केली. मात्र या थरारक प्रसंगामध्ये पोलिसांनी रोहितचा एन्काऊंटर केला. दरम्यान आता या घटनेतील आरोपी रोहित आर्यने मुलांना ओलीस ठेवण्यापूर्वी त्यांच्यासोबतचा एक ऑडिशनचा व्हिडिओ सोशल मीडियावर व्हायरल केला. या व्हिडिओमध्ये मुले अभिनय करताना दिसत आहेत. त्यानंतर आरोपीने या मुलांना ओलीस ठेवून प्रशासनाकडे आपल्या मागण्या पूर्ण करण्याची मागणी केली होती. या ऑडिशनचा व्हिडिओ आता व्हायरल झालाय.