राज्याच्या राजकारणात पालकमंत्रिपदावरून वाद सुरू आहे. पालकमंत्रिपदावरून सुरू असलेले महायुतीतले हे वाद आता चव्हाट्यावर आले आहेत. नाशिक आणि रायगडच्या पालकमंत्रिपदाला स्थगिती देण्यात आलेली आहे. मंत्री गिरीश महाजन आणि आदिती तटकरे यांना हा अतिशय मोठा धक्का मानला जात आहे. कारण गिरीश महाजन यांना नाशिकचं पालकमंत्रिपद दिल्याने दादा भुसे नाराज आहेत. तर रायगडमध्ये आदिती तटकरे यांना पालकमंत्रिपद दिल्याने भरत गोगावले नाराज आहेत. भरत गोगावले यांना डावललं म्हणून महाडमध्ये शिवसैनिकांनी रास्तारोको देखील केला. इतकंच नाही तर दादा भुसे आणि भरत गोगावले यांनी आपली नाराजी उघडपणे देखील बोलून दाखवली आहे.

एकीकडे रायगडमध्ये भरत गोगावले आणि आदिती तटकरे यांच्यात पालकमंत्रिपदावरून रस्सीखेच सुरू होती. तर यापूर्वी दादा भुसे यांच्याकडे असलेलं नाशिकचं पालकमंत्रिपद आता गिरीश महाजन यांना दिल्याने भुसे नाराज झाले आहे. रायगडच्या पालकमंत्रिपदावर शिवसेनेने दावा केला होता. भरत गोगावले यांना रायगडचं पालकमंत्रिपद हवं होतं. रायगडमध्ये शिंदे सेनेचे आणि भाजपचे प्रत्येकी ३ आमदार आहेत. तर अजित पवार यांच्या राष्ट्रवादीचा एकच आमदार असतानाही पालकमंत्रिपद आदिती तटकरे यांना दिलं गेलं आहे. त्यामुळे नाराज गोगावले समर्थकांकडून रास्तारोको देखील करण्यात आला आहे. आता महायुतीच्या वारिष्ठांकडून यावर नेमका काय तोडगा काढला जाणार हे पहाणं महत्वाचं ठरणार आहे.