बुधवारपासून पुण्यात पावसाची जोरदार बॅटिंग सुरू आहे. त्यामुळे गुरुवारी होणारा पंतप्रधान नरेंद्र मोदींचा पुणे दौरा रद्द करण्यात आला आहे. विधानसभा निवडणुकीच्या तोंडावर जास्तीत जास्त कामांच्या लोकार्पण आणि भूमिपूजनावर सत्ताधारी पक्षाच भर होता. पण पावसामुळे पुणे दौरा रद्द करण्यात आला आहे.

हवामान खात्याकडून पुण्याला पावसाचा अलर्ट देण्यात आला आहे. 2 दिवसांपासून पुण्यात मुसळधार पाऊस सुरू आहे. गुरुवारी देखील पावसाचा अंदाज सांगण्यात आला आहे. त्यामुळे पीएम मोदींचा पुणे दौरा रद्द करण्यात आला. पंतप्रधान कार्यालयाकडून मोदींचा पुणे दौरा रद्द करण्यात आल्याची माहिती देण्यात आली आहे. पंतप्रधान नरेंद्र मोदी यांच्या हस्ते आज तब्बल 12 विकास कामांचं उद्घाटन होणार होतं. त्याच बरोबर पुण्यातील एसपी कॉलेजच्या मैदानावर सभेचे देखील आयोजन करण्यात आलं होतं. मात्र या सभेवर गेल्या तीन दिवसांपासून पावसाचे सावट असल्यामुळे ही सभा होणार का नाही असा प्रश्न निर्माण झाला होता. अखेर गुरुवारी पंतप्रधान कार्यालयाकडून मोदींचा पुणे दौरा रद्द करण्याचा निर्णय घेण्यात आला.