पंढरपूरमध्ये कार्तिकी एकादशीच्या सोहळ्याची जय्यत तयारी सुरू झाली आहे. यंदा 2 नोव्हेंबर रोजी कार्तिकी एकादशी साजरी होणार असून, त्या पार्श्वभूमीवर आजपासून विठ्ठलाचे 24 तास दर्शन सुरू करण्यात आले आहे. परंपरेनुसार कार्तिकी एकादशीच्या आधी विठ्ठलाचे राजोपचार बंद करून पलंग काढला जातो, आणि देवाला अखंड दर्शनासाठी खुले ठेवले जाते. त्यामुळे विठोबा भक्तांना आता कोणत्याही वेळी विठ्ठलाचे दर्शन घेता येणार आहे. हे अखंड दर्शन 9 नोव्हेंबर रोजीच्या प्रक्षाळ पूजेपर्यंत सुरू राहणार आहे. आषाढी एकादशीनंतर पुन्हा एकदा भक्तांसाठी पंढरपूरमध्ये श्रद्धेचा महासागर उसळणार असून, राज्यभरातील भाविक मोठ्या संख्येने पंढरपूरकडे रवाना होत आहेत.