विधान भवनच्या लॉबीमध्ये झालेल्या गोंधळाच्या प्रकरणात मोठी कारवाई करण्यात आली आहे. या प्रकरणात दोघांनाही नितीन देशमुख आणि ऋषिकेश टकले यांना पोलिसांनी अटक केली आहे. नितीन देशमुख हे राष्ट्रवादी काँग्रेस (शरद पवार गट) नेते जितेंद्र आव्हाड यांचे तर ऋषिकेश टकले हे भाजप आमदार गोपीचंद पडळकर यांचे कट्टर कार्यकर्ते आहेत.

काल विधान भवन परिसरात आव्हाड आणि पडळकर यांच्या समर्थकांमध्ये जोरदार धक्काबुक्की आणि मारहाण झाली होती. अचानक उफाळलेल्या या गोंधळामुळे परिसरात काही काळ तणाव निर्माण झाला होता. घटनास्थळी सुरक्षा वाढवण्यात आली होती. आता या प्रकाराची गंभीर दखल घेत पोलिसांनी संबंधित दोघांवर कारवाई करत त्यांना अटक केली आहे. या प्रकरणाची चौकशी सुरू असून राजकीय वर्तुळात या घटनेचे पडसाद उमटत आहेत.