अमरावतीच्या माजी खासदार नवनीत राणा या अमरावती जिल्हा रुग्णालयातील स्वच्छतेवरुन आक्रमक झालेल्या बघायला मिळाल्या. नवनीत राणा यांनी जिल्हा शल्य चिकित्सकांना फोन लावून चांगलंच धारेवर धरलं. 'जिल्हा रुग्णालयात स्वच्छता करा. नाहीतर मी तिथे येऊन धिंगाणा करेन.', असा दम नवनीत राणा यांनी दिला. यावेळी नवनीत राणा यांनी जिल्हा रुग्णालयात सीटीस्कॅन देखील बंद असल्याची तक्रार अधिकाऱ्यांकडे केली.

स्वच्छतेचा प्रश्न आणि सिटीस्कॅनचा मुद्दा यावर ताबोडतोब तोडगा काढावा, अशी मागणी नवनीत राणा यांनी केली. 'खूप धिंगाणा होऊन जाईल. कारण मी आज फोटो बघितले. तिकडचे वॉशरुम इतके अस्वच्छ आहेत की कोणताही गरीब पेशंट किंवा कुणीही तिकडे जाऊ शकत नाही. स्वच्छतेचं कंत्राट ज्यांनी घेतलं आहे ते काय करत आहेत? मी काय करु, मला समजतच नाही. सरकार एवढ्या मोठ्या प्रमाणात कंत्राटाचे पैसे देते आणि एकही माणूस तिथे जाऊ शकत नाही. एवढ्या उन्हात ते कुठे जातील?', असा सवाल नवनीत राणा यांनी केला. यावेळी त्यांनी लवकरच स्वच्छता करा नाही तर मी धिंगणा करेल असा सज्जड दम शल्य चिकिल्सकांना दिला.