नाशिक : इगतपुरी तालुक्यातील मुंढेगाव जवळ गोदान एक्स्प्रेसच्या डब्याखालून धूर निघाला. त्यामुळे एकच खळबळ उडाली. अप मार्गाच्या गोदान एक्स्प्रेसच्या बोगीच्या खाली असलेले लायनर ओव्हर हीट होऊन घासल्याने धूर निघू लागला. दरम्यान, गार्ड आणि चालकाने प्रसंगावधान राखत गाडी थांबवली आणि त्यामुळे थोडक्यात मोठा अनर्थ टळला. धूर बघून प्रवाशांची तारांबळ उडाली होती. काही प्रवाशांनी रेल्वेतून उड्याही मारल्या. गार्ड आणि ड्रायव्हर दोघांनी उतरून एक्स्प्रेस चेक केली. त्यानंतर गाडी इगतपुरी स्थानकात आल्यानंतर गाडीची बोगी लायनर दुरुस्त करून मुंबईच्या दिशेने रवाना करण्यात आली.