नाशिक: नाशिकमध्ये 2027 मध्ये कुंभमेळा होणार आहे. याच पार्श्वभूमीवर नाशिकच्या जिल्हाधिकारी कार्यालयमध्ये मुख्यमंत्री देवेंद्र फडणवीस यांची सर्व साधू महंतांसोबत बैठक पार पडली. या बैठकीत कुंभमेळ्याच्या शाहीस्नान आणि अमृतस्नानाच्या तारखा जाहीर करण्यात आल्या. यानंतर देवेंद्र फडणवीस यांनी पत्रकारांशी संवाद साधला.

ते म्हणाले, सर्व साधू महंतांसोबत आणि पुरोहित संघासोबत बैठक झाली. या बैठकीमध्ये पुढची कशी कारवाई करायची यावर चर्चा झाली. सर्व साधू महंतांचे आम्ही ऐकून घेतले. आता पर्यंत काय कारवाई झाली हे देखील आम्ही त्यांना सांगितले. तसेच 4 हजार कोटी रूपयाच्या वेगेवेगळ्या निविदा आम्ही काढलेल्या आहेत. त्यातल्या काही अंतिम टप्यात आहे. जवळपास 2 हजार कोटी रूपयाच्या निविदा आपण काढणार आहोत. प्रामुख्याने गोदावरी स्वच्छ करणे यासाठी गिरीश महाजन यांनी एक योजना तयार केली आहे ही देखील मान्य केली जाणार असून नाशिमध्ये अनेक विकासकामे केली जाणार असल्याचे देवेंद्र फडणवीस म्हणाले.