नांदेड जिल्ह्यात अवैध रेती उत्खननाविरोधात महसूल विभागाने आज मोठी आणि धडक कारवाई केली आहे. गोदावरी नदीपात्रात सुरू असलेल्या बेकायदेशीर रेती उपशावर कारवाई करत महसूल विभागाने तब्बल ३५ लाख रुपयांचा मुद्देमाल उद्ध्वस्त केला आहे.

महसूल विभागाचे पथक गस्तीवर असताना त्रिकूट परिसरात अवैध रेती उपसा सुरू असल्याचे निदर्शनास आले. याठिकाणी रेती उत्खननासाठी वापरण्यात येणाऱ्या बोटी आणि साहित्य आढळून आले. कारवाईदरम्यान दोन बोटी मजुरांच्या मदतीने नदीत बुडवून टाकण्यात आल्या, तर एक मोठी बोट जिलेटीनच्या सहाय्याने स्फोट घडवून पूर्णपणे उद्ध्वस्त करण्यात आली.

या कारवाईमुळे अवैध रेती माफियांमध्ये खळबळ उडाली असून महसूल विभागाकडून पुढील कारवाईही सुरूच राहणार असल्याचे सांगण्यात आले आहे.