मुंबईमध्ये पावसाने चांगलाच जोर धरला आहे. मुंबई, ठाणे, नवी मुंबईत सध्या मुसळधार पाऊस पडत आहे. या पावसाचा परिणाम आता लोकल वाहतूक, रस्ते वाहतुकीवर होताना दिसत आहे. मध्य रेल्वे, पश्चिम रेल्वेची वाहतूक विस्कळीत झाली आहे. लोकलसेवा उशिराने सुरू आहेत. ऐन गर्दीच्या वेळी पावसामुळे वाहतूक विस्कळीत झाल्यामुळे कामावर निघालेल्या मुंबईकरांचे हाल होत आहेत. आठवड्याच्या दुसऱ्या दिवशी ऑफिसला उशिर होणार असल्यामुळे लेटमार्क लागण्याची शक्यता आहे.

मध्य रेल्वे मार्गावरील कल्याण ते सीएसएमटी, पश्चिम रेल्वे मार्गावरील चर्चगेट ते विरार आणि हार्बर रेल्वे मार्गावरील सीएसएमटी ते पनवेल या लोकलसेवा १० ते १५ मिनिटं उशिराने सुरू आहेत. लोकल उशिराने धावत असल्यामुळे रेल्वे स्थानकावर प्रवाशांची गर्दी पाहायला मिळत आहे. ऐन गर्दीच्या वेळी लोकल विलंबानं धावत असल्याने रेल्वे स्थानकांवर प्रवाशांची आणखी गर्दी होण्याची शक्यता आहे. तर दुसरीकडे मुंबई, ठाणे आणि नवी मुंबईतील अनेक प्रमुख रस्त्यांवर पावसामुळे वाहतूक कोंडी झाल्याचे पाहायला मिळत आहे.