Mumbai police notice to Manoj Jarange in Azad Maidan case : मराठा आरक्षण कार्यकर्ते मनोज जरांगे पाटील यांना मुंबई पोलिसांनी नोटीस बजावली आहे. मुंबईतील आझाद मैदान पोलिस ठाण्यात मार्च-एप्रिल महिन्यात दाखल झालेल्या एका गुन्ह्याच्या तपासासंदर्भात ही नोटीस असून, जरांगे यांना १० नोव्हेंबर रोजी चौकशीसाठी हजर राहण्याचे आदेश देण्यात आले आहेत. या नोटिशीनुसार, 'गुन्ह्याच्या तपासादरम्यान तुमच्याकडे विचारपूस करण्यासाठी सबळ व वाजवी कारणे असल्याने, तुम्ही १० नोव्हेंबर रोजी सकाळी ११ वाजता आझाद मैदान पोलीस ठाण्यात उपस्थित राहून तपासात सहकार्य करावे'. परवानगीशिवाय आंदोलन करणे, बेकायदा जमाव जमवणे आणि वाहतुकीस अडथळा निर्माण करणे अशा आरोपांखाली जरांगे यांच्यासह त्यांचे सहकारी वीरेंद्र पवार, पांडुरंग तारक, गंगाधर काळकुटे, चंद्रकांत भोसले आणि प्रशांत सावंत यांच्यावर गुन्हा दाखल करण्यात आला होता. आता या प्रकरणी पोलीस काय कारवाई करणार आणि मनोज जरांगे पाटील चौकशीला सामोरे जाणार का, याकडे सर्वांचे लक्ष लागले आहे.