मुंबईची लोकल ट्रेन ही लाखो प्रवाशांसाठी रोजच्या प्रवासाचे महत्त्वाचे साधन आहे. मात्र, याच लोकलमध्ये महिलांच्या सुरक्षेबाबत एक धक्कादायक प्रकार समोर आला आहे. लोकलमधून प्रवास करणाऱ्या महिलांचे गुपचूप फोटो आणि व्हिडिओ काढून त्यांचा गैरवापर करण्यात आला आहे. याप्रकरणी एका तरुणाला अटक करण्यात आली आहे.

मिळालेल्या माहितीनुसार, चर्चगेट ते विरार दरम्यान प्रवास करणाऱ्या महिलांचे आरोपीकडून चोरून व्हिडिओ काढले जात होते. त्यानंतर आर्टिफिशियल इंटेलिजन्स म्हणजेच AI तंत्रज्ञानाचा वापर करून या व्हिडिओंमध्ये बदल केले जात होते. महिलांचे फोटो आणि व्हिडिओ मॉर्फ करून त्यातून अश्लील रील्स तयार केल्या जात असल्याचा आरोप आहे. या रील्स इंस्टाग्रामवर पोस्ट करून जास्तीत जास्त व्ह्यूज मिळवण्याचा प्रयत्न केला जात असल्याची माहिती समोर आली आहे.

या प्रकरणी पोलिसांनी साबीर मोहम्मद रुस्तम याला अटक केली आहे. तसेच त्याचा मोबाईल फोनही जप्त करण्यात आला आहे. पोलिसांना या मोबाईलमध्ये अनेक महिलांचे फोटो आणि व्हिडिओ आढळल्याची माहिती आहे. या घटनेमुळे लोकलमधून प्रवास करणाऱ्या महिलांच्या सुरक्षेचा प्रश्न पुन्हा एकदा चर्चेत आला आहे.