मुंबईतील मेट्रोसेवा विस्कळीत झाल्यानंतर मोनो रेलसेवा देखील सकाळपासून ठप्प झाली होती. वडाळा ते प्रतीक्षानगर मोनो रेल स्थानकाजवळ तांत्रिक बिघाड झाल्यामुळे वाहतूक तब्बल अडीच तासांपासून ठप्प झाली होती. या अचानक झालेल्या तांत्रिक बिघाडामुळे प्रवाशांची मोठी गैरसोय झाली. शेकडो प्रवासी मोनो रेल स्थानकांवर अडकले होते. अनेकजण वेळेत ऑफिसला पोहोचू शकले नाहीत. तर काहींनी पर्यायी वाहतुकीचा वापर करत ऑफिस गाठले.

तसंच घाटकोपर ते वर्सोवा मेट्रोमध्ये तांत्रिक बिघाड झाला होता. घाटकोपर स्थानकावर प्रवाशांची मोठी गर्दी पाहायला मिळाली. काही वेळात दुरुस्तीचे काम पूर्ण झाले पण अद्यापही मेट्रोसेवा उशिराने सुरू आहे. मोनोरेल्वे प्रशासनाकडून तांत्रिक बिघाड दुरूस्तीचे काम सुरू असून काही वेळातच दुरूस्तीचे काम पूर्ण होऊन मोनो रेल सेवा सुरळीत होण्याची शक्यता प्रशासनाने वर्तवली आहे.