मुंबईकरांसाठी अतिशय मोठी आणि महत्वाची बातमी समोर आली आहे. हार्बर मार्गावरील लोकल सेवा पुन्हा एकदा विस्कळीत झाली आहे. बेलापूर स्थानकादरम्यान तांत्रिक बिघाड झाल्याने लोकलसेवेवर परिणाम झाला आहे. त्यामुळे सीएसएमटी येथून पनवेलकडे आणि पनवेल येथून सीएसएमटीच्या दिशेने जाणाऱ्या लोकल गाड्या ठप्प झाल्या आहेत.

परिणामी प्रवाशांचा मोठा खोळंबा झाला असून रेल्वेस्थानकावर गर्दी होत आहे. सध्या रेल्वे प्रशासनाकडून तांत्रिक बिघाड दुरुस्त करण्याचे काम सुरू आहे. प्रवाशांनी संयम बाळगावा, असे आवाहन रेल्वे प्रशासनाकडून करण्यात आलंय. पुढील सूचना मिळेपर्यंत लोकलसेवा ठप्प राहणार असल्याची माहिती मिळतेय.

मिळालेल्या माहितीनुसार, हार्बर मार्गावरील सीबीडी बेलापूर स्थानकाजवळ ओव्हरहेड वायरमध्ये तांत्रिक बिघाड झाल्याने पनवेल येथून सीएसएमटीकडे जाणाऱ्या लोकल ट्रेन ठप्प झाल्या आहेत. दरम्यान, पनवेलकडे जाणारी वाहतूक पूर्वपदावर आली आहे. मात्र सीएसएमटीकडे जाणारी वाहतूक अजूनही ठप्पच असल्याने प्रवाशांना मोठा मनस्ताप सहन करावा लागतोय.