सध्या संपूर्ण महाराष्ट्रात गणेशोत्सवाची धूम आहे. खासकरून मुंबईच्या लालबाग-परळ या भागात गणेशोत्सवाचा वेगळा उत्साह आणि लगबग दिसून येते आहे. लालबागच्या राजाचं दर्शन घेण्यासाठी दरवर्षी राज्यभरातून अनेक लोक येत असतात. बाप्पााच्या दर्शनासाठी भाविक लांबच लांब रांगा लावतात. दर्शनसाठी व्हिआयपी आणि सर्वसामान्यांच्या दोन रांगा असतात.

अगदी काल परवाच लालबाग राजाच्या मंदिरातील एक व्हिडीओ सोशल मीडियावर व्हायरल झाला होता. या व्हिडीओत व्हिआयपींना निवांत दर्शन आणि सर्वसामान्यांची फरफट होत असल्याचं दिसून आलं होतं. या व्हिडीओनंतर सोशल मीडियावर मोठ्या प्रतिक्रिया उमटल्या. हा प्रकार ताजा असतानाच आता आणखी एक व्हिडीओ सोशल मीडियावर व्हायरल होत आहे.

या व्हिडीओत व्हीआयपींना निवांत दर्शन आणि सर्वसामान्यांच्या मानगुटी धरून फेकलं जात असल्याचं समोर आलंय. व्हिडीओ पाहून नेटकरी नाराज झाले असून अनेकांनी संताप व्यक्त केलाय. लालबागच्या राजाचं दर्शन व्हावे यासाठी दूरवरून आलेल्या भाविकांसोबत गणपती मंडळाच्या सदस्यांनी केलेलं असं वर्तन चुकीचं आहे, अशा प्रतिक्रिया नेटकरी देत आहेत.