मुंबई हायकोर्टाने गणेशोत्सवात पीओपी पासून बनवलेल्या मोठ्या गणेशमूर्तींचंही कृत्रिम तलावातच विसर्जन व्हावं, असं स्पष्ट मत नोंदवलं आहे. ८ फूटांपर्यंतच्या पीओपी मूर्तींचं विसर्जन कृत्रिम तलावात करणे बंधनकारक करावं, यावर गंभीरपणे विचार करण्याच्या सूचना न्यायालयाने राज्य सरकार आणि महापालिकेला दिल्या आहेत.

सध्या ५ फूटांपर्यंतच्या मूर्तींसाठीच कृत्रिम तलावात विसर्जन बंधनकारक आहे. मात्र, ५ फूटांपेक्षा अधिक उंचीच्या मूर्तींची संख्या ७ हजारांहून अधिक असल्याचं सरकारने स्पष्ट केलं आहे. त्यामुळे सध्या उपलब्ध असलेल्या कृत्रिम तलावांमध्ये या सर्व मोठ्या मूर्तींचं विसर्जन करणे शक्य नसल्याचंही सरकारने कोर्टात सांगितलं आहे.