मुंबई-गोवा महामार्गाचे काम एप्रिल २०२६ पूर्वी पूर्ण होईल, अशी माहिती केंद्रीय मंत्री नितीन गडकरी यांनी लोकसभेत दिली. शिवसेना (उबाठा) खासदार अरविंद सावंत यांनी विचारलेल्या प्रश्नाला उत्तर देताना मंत्री गडकरींनी ही नवीन डेडलाईन जाहीर केली.

सावंत यांनी महामार्गाच्या रखडलेल्या कामाबद्दल अनेक प्रश्न उपस्थित केले. मुंबई- गोवा महामार्गासाठी 'चांद्रयान मोहिमेपेक्षा जास्त खर्च झाला आहे, तरीही काम अपूर्ण का?' तुम्ही यात जातीनं लक्ष घाला. तरच काहीतरी होईल. दहा वर्षांपासून खूपच बिकट परिस्थिती आहे, असं सावंत म्हणाले. त्यावर नितीन गडकरींनी उत्तर दिले. हे काम २००९ मध्ये सुरू झाले. मी २०१४ मध्ये मंत्री झालो. जमीन संपादनाचा प्रश्न होता. आतापर्यंत खूप कंत्राटदार बदलले गेले. खूप कारवाया देखील करण्यात आल्या. या मार्गाचे ८९ टक्के काम पूर्ण झाले असून, कंत्राटदारांच्या अडचणींमुळे उशीर झाला. मात्र, एप्रिल २०२६ पर्यंत हा मार्ग पूर्ण होईल. खूप विलंब झाला हे मान्य करतो, असे गडकरी म्हणाले.