दिवाळी आणि सलग सुट्ट्यांमुळे कोकणात जाणाऱ्यांची संख्या मोठ्या प्रमाणात वाढली आहे. त्यामुळे मुंबई-गोवा महामार्गावर विशेषतः माणगाव परिसरात मोठ्या प्रमाणात वाहतूक कोंडी झाली आहे. तब्बल ३ ते ४ किलोमीटरपर्यंत वाहनांच्या लांबच लांब रांगा लागल्या असून प्रवाशांना मोठ्या प्रमाणावर वाहतूक कोंडीचा सामना करावा लागत आहे. कोकणगावाकडे जाणाऱ्या लेनवर ही कोंडी अधिक असल्याचे चित्र दिसत आहे. अनेक ठिकाणी वाहनं रेंगाळत पुढे सरकत आहेत. महामार्गावरील वाढलेला ताण लक्षात घेऊन पोलिसांकडून वाहतूक सुरळीत करण्यासाठी प्रयत्न सुरू आहेत. दरम्यान, कोकणात दिवाळी साजरी करण्यासाठी मुंबई-पुण्यासह राज्याच्या विविध भागांतून नागरिक मोठ्या संख्येने निघाले आहेत. त्यामुळे मुंबई-गोवा महामार्गावरील हा ताण आणखी वाढण्याची शक्यता वर्तवली जात आहे.