मावळ तालुक्यातील लोहगड किल्ल्याच्या पायथ्याशी असलेल्या डोंगराला भेगा पडल्याची माहिती समोर येत आहे. लोहगड आणि ढालेवाडी या दोन गावाजवळील डोंगराला भेगा पडल्या असून त्यामुळे भूस्खलन होण्याची भिती आहे. त्यामुळे ग्रामस्थांमध्ये भीतीचे वातावरण निर्माण झाले आहे. डोंगरावर जनावरे चारण्यासाठी गेलेल्या गुराख्याला या भेगा दिसल्या, त्यांने तातडीने ग्रामस्थांना सतर्क केले. त्यानंतर अधिकाऱ्यांनी येऊन पाहणी केली. प्रशासन ग्रामस्थांच्या संपर्कात असल्याचे तहसीलदार विक्रम देशमुख यांनी सांगितले असून लोहगड किल्ल्याच्या पायथ्याशी असलेल्या लोहगड गावात पाचशे ते सहाशे लोक वस्तीस आहेत. धालेवाडी 250 ते 300 लोकवस्तीचे गाव आहे. मागील अनेक दिवसांपासून या परिसरात मोठ्या प्रमाणात पाऊस पडत असल्याने भूस्खलनाचा धोका निर्माण झालाल आहे.