घरात चार मतं आहेत, तरी मला दोनच मतं कशी मिळाली? असा सवाल मनसे उमेदवाराने ईव्हीएम घोटाळ्याच्या आरोपावरती उपस्थित केला आहे. मनसेचे दहिसरचे उमेदवार राजेश येरुणकर यांनी ईव्हीएम घोटाळ्याचा हा आरोप केला आहे.

विधानसभा निवडणुकीचे निकाल जाहीर झाले आहेत. त्यानंतर महायुतीच्या विजयावर शिक्कामोर्तब झालं आहे. तर महाविकास आघाडी तसंच मनसेचा दारुण पराभव झाला आहे. विधानसभेत यावेळी मनसेला आपलं खातंही उघडता आलेलं नाही. त्यानंतर आता विरोधकांकडून ईव्हीएम घोटाळ्याचे आरोप केले जात आहेत. त्याच अनुषंगाने मनसेचे दहिसरचे उमेदवार राजेश येरुणकर यांनी देखील आता ईव्हीएम घोटाळ्याचा आरोप केला आहे. माझ्या घरात मी, माझी पत्नी, मुलगी आणि आई अशी चार मतं आहेत. तरीही मला दोनच मतं कशी मिळाली असा थेट सवालच त्यांनी उपस्थित केला आहे. त्याचबरोबर फॉर्म नंबर 17सी आणि ईव्हीएम मशीनचा नंबर देखील जुळत नसल्याचं येरुणकर यांनी म्हंटलं आहे. दोन-दोन दिवस झाल्यानंतर ईव्हीएम मशिनच चार्जिंग 99 टक्के कसं राहातं, असा प्रश्न देखील त्यांनी विचारला आहे.

Edited By Rakhi Rajput